أكره طاري غيابـــــك !!
يامرحباً عد ما أكره طاري غيابـك
يا واحد فيك عقلي يشبه جنـــــوني
قلبي .. وش اللي تبيه أشر بسبابك
نذر علي هقوتك ما تنثني دونـــــي
أنته حبيبي وأنا هم سيد أحبـــــابك
محد حضنته مثل شرواك بعيــوني
لك بسمة من نظرها يحسد أصحابك
ليتك تبسم لناس فيك لامــــــــــوني
المتــــــــاهة
جيتني كنك الغيمة بعين بـــــــــــــدوي
يوم هلت جرح بطن الوطا سيلــــــــها
جيت تطوي مسافات المفارق طـــــوي
مثل بدو طوت طول البطا خيلـــــــها
والله انك على طول المدى لـي خـوي
وأنت صبري بهالدنيا على ميلــــــهــا
إيه أنا الظامي اللي منك أبد ما روي
اسقني طف لوعة روحي وويلهـــــا
نارحبك كوتني في خفوقي كـــــــوي
ومهرة الشوق تجمح لك على حيلــها
الغلا بالمواصل والامل مستــــــوي
وظلمتك أشعل سنيني قناديلـهــــــــا
صادق الوعد
صادق الوعد لو دونك مسافة طويــلــة
داعي الحب يجبرني والبي نـــــــــداك
واتحدى الظروف اللي بوصلك بخيــلة
ما ترد الحواجز خطوتي عن لقـــــــاك
المصاعب على شانك تراها ذليلــــــــة
حطمتها مشاعر قلب عاشق رضـــــاك
كل مشتاق قلبه في المحبة دليلــــــــــة
أعطني صادق احساسك وروحي فداك
على حطة ايدك
أنا على حطة يدك ما تغيــــــــــــــرت
بس انت قلي وش سبايب غيــابـــــــك
نسيتني والحين يعني تـــــــــــــذكرت
وإلا الهوى من دون تدري مشى بـــك
وإلا على خل يحبك تكبــــــــــــــرت
وإلا زمان كان ضدي غدابــــــــــــك
أعاتبك من كثر ما فيك فــــــــــــكرت
وعقب العتب من كل قلبي هلابــــــك
ليه اختفيتي ؟؟!
ليه اختفيتي وانتي الهام وأســـــرار
ليه اختفيتي وأنت أحلى المواويـــل
ليه اختفيتي وانت آمال وأفكــــــــار
ليه الرجاء ترفض رجاه المواصيــل
يا أعز وأغلى من سعت فيه الأقــدار
ويا أجمل رسالة في حياة المراسيـل
سألت عنك الغيث ومزون الامطــار
ولا جاوبني صادقات المخاييــــــــل
عدلي وميلي
ظميت وجفت عروقي ..ومابه لاسحاب وسيـــــل
تعبت أصرخ بصوت الصدق ولاتوصل مراسيلي
دريت إن الــــوفاء أصبح نهـارندفنه في الليــــــل
ودريت إن الصدق كذبة مثل كذبة مواويـــــــــلي
وعرفت إن الأمل خيط تعلق به ضعيف الحيــــل
وأنا أول من تعلق به وانا أدري فيه تضليـــــــلي
يموت الحلم في عيني وتشيله دموعي سيـــــــــل
ملامح وجهي دموع تعزيهـــــا مناديــــــــــــــلي
مســــــافاتك
أعرف أجف في عيني وأعرف أسيل من عينك
وأعرف أضيع لين ألقاك مع دربي وخطـــواتي
اذا انتي ما عرفتي وين قلبي كيف تلقينــــــــــه
وإذا انتي ما مشيتي يوم ما تقصر مسافاتـــــــي
أنا فيني مسافاتك وانا كلي عناوينـــــــــــــــــك
تروحين وتجين وما وصل حدك نهاياتــــــــــي
على صدري نبت عطر أظنه كان بيدينــــــــــك
ياليته ما وشا صدري عن اللي كلم سكــــــــاتي
تعالي قسوة يركع لها ضحك عرف لينــــــــــك
انا سلمت بيد ذنوب حزنــــــي كل زلاتـــــــــي
ما عاد تستاهـل
كل حاجة طعمها مر في هالزمـــــــــان
هم هالدنيا وحنا نعيش لهمهــــــــــــــــا
المكان اللي عرفناه ما عاد المـــــكـــان
والقلوب أحداث الأيام زادت غمهـــــــا
صاحبي حتى أنت ما عاد تستاهل حنان
انت بعثرت المشاوير وانت تلمهــــــــا
صاحبي لو كان للناس والدنيا أمــــــان
ما تموت ورود الأحلام قبل نشمهــــــا
قرب الأغراب
حنا ظلمنا الحب في قولنا احبـــــــــاب
نجرح سمو الحب .. نجرح عفافــــــــه
في وقتنا ضاع الهوى حرف بكتــــــاب
في وقتنا أعلن عطانا جفافـــــــــــــــــه
وصف المشاعر رعشة يدين واهــــداب
وما بيننا دين المشاعر مســـــــــافــــــه
نخون .. نخلق بالكذب عذر واسبـــــاب
نكذب .. نظن الكذب فن وحرافــــــــــه
نقرب ولكن قربنا قرب الاغـــــــــــراب
يضيع كل العمر منا حسافـــــــــــــــــه
وإلا التقينا من تعب طوله غيـــــــــــاب
نوصف عذاب البعد وصف الكلافـــــــة
أنا أشهد ان الحب عايش بلا أصحــــاب
وآمنت بإن الحب وهم وخرافـــــــــــــه
طاريك ... سعـــــــادتــي
ياشين حكي اسمعه ما فيه طاريــــك
لاشك أداري ضيقتي عند الأحبــــاب
وإن طالت الجلسة ومحدٍ حكى فيك
تروح لك كل المشاعر بلا حســـاب
وأعيد أذكرهم بسالف لياليـــــــــــك
قصدي أجيب لسيرتك عندي أسبــاب
ما عاد يسعدني ابد غير طاريــــــك
ولا عاد غيرك صار للقلب جــــذاب
حزن صـــادق
هلابك غيمة تبكي دموع الشاعر المجـــروح
هلابك شمعة تضوي ظلام الخافق المنضـــام
هلابك بلسم لجرحي تداوي قلبي المفضـــوح
هلابك دمعة سالت على خد الأمل قـــــــــدام
هلابك عد ما أمطر سحاب صامت مجـــروح
هلا يا مبكي حروفي على صدري بــدون آلام
هلابك فاضح سري ومجبرني عليه النـــــوح
هلا بحزن ملازمني وساكني كثير أعــــــوام
أبنسى .. بس .. نسيانك !!
أبنسى .. لازم أنسى .. كيف أبنسى وانتي بعيني
على حد الرموش انتي واشوف الكون بعيانــــك
اببعد .. لازم أبعد .. كيف اببعد وانتي سنينــــي
أعيشك يا حياتي والضياع المر عنوانــــــــــك
عرفتك قبل أعرفك ساكنة في كل تكويـــــــــني
تغنين بحنان مسكنة في خافق انسانــــــــــــــك
خذي مجنون حرفي يا ( ... )..لا..كلي اخذيني
أنا اخاطب جنونك يا ( ... ) وريني جنونــــك
احس اني بدونك شئ اساسي ناقص فينــــــــي
واحس انك بدوني ناقصة وانا على شانـــــــك
ابيك وميت فيك وعلى الفرقا تحدينــــــــــــــي
بذرت الك الوفا واللي حصدته منك جحدانــــك
انا وشلون اببرى من صوابك وش يداوينـــــي
ياليت انك تجودي بالشفا واشفى من ادمانــــــك
شربتك من ضماي وجف وصلك في شرايينـــي
حضنتك بالعيون ومات همي بين ذرعانــــــــك
ابنسى .. لازم أنسى ؟ كيف أبنسى وانتي بعيني ؟
تبين الصدق أبنسى .. ايه أبنسى .. بس نسيانك
عطشانتك
متغلية لكن عليك انت ما أظـن
ياسيد الدنيا وسيد حياتــــــــــي
تستاهل أكثر من غلايه بلا من
يا راس مالي بالوجود وغناتـي
ان قلت احبك ودي انك تطمـن
قلبي يقول اللي تقوله شفاتـــــي
من غير ودك وسط روحي تمكن
من غير صوتك لم باقي شتاتــي
دنياك تهوس يعلم الله تجنـــــــن
وأنا بروعة عالمك يا حلاتـــــي
أقول ابهرب من جنونك وهــوّن
أعرف هروبي من حياتك وفاتي
باقولها في عالي الصوت وأعلـن
عطشانتك يادجلتي يا فراتـــــــي
حجاب الليل
هلابك ياربيع شقت بروقه حجاب الليــــــــــل
هلابك والعيون لشوفتك في دمعها غرقـــــــى
هلابك عَز.. والي برقك اللي يوجب التهليــل
هلا وان قلتها لك يبتسم ثغر السما الزرقــــــا
حبيبي لا لفيت أسرجت لعيونك ظهور الخيـل
ولا هانت عيون تجعلك فوق الهرم ترقـــــــا
تعال بكل مابك من جمال يرفض التبديـــــــل
تعال وخل طعنة رمح عينك في الجسد تبقـــا
أحب أقابلك واكره وداعك يا حبيبي حيــــــل
الى صارت يميني ترتعش في كفك الغرقـــــا
وشلون أعيد الأمس
خذتني لحظة الذكرى..ونادت همي البـــــــــــــــاقــي
وقفت .. وغافلت عيني دموع الخوف والتوبـــــــــــه
بكيت الليل .. وصنوف الهوان .. وعاطر أوراقــــي
وياسي ..والعذاب المر .. وغي القلب وذنوبــــــــــة
تعبت من الوهم .. والكذب يرتع في ذرى احداقــــــي
أشوف العوق يبعدني .. وعيني تلحق دروبــــــــــــه
خطاي اكبر من آهات السهروالحب واشواقـــــــــــي
عجزت اداري جروح الزمان وكثرة عيوبــــــــــــــه
انا مليت من زيف يسميه البعض راقــــــــــــــــــــي
ونفسي عافت كنوز السراب ومن تحلوبـــــــــــــــــه
خلصت من الهوى ماتت مشاعر قلبي الشاقـــــــــــي
انا وشلون اعيد الامس .. وذاتي فيه مسلوبــــــــــــه
جيت وإلا رحت غالي
ما يغير موقفي قربك وبعـــــــــــدك
لك مكانة ما تغيرها الليــــــــــــــالي
إن نزلت القلب شرف من يــــــردك
جيت غالي وإن نويت تروح غـــالي
انت خلاني وكل الناس وحـــــــدك
انت وحدك منتهى مرمى خيــــــالي
من يلومون العيون اللي تـــــــودك
ما دروا عن لهفتي بك وانشغـــــالي
يا دفاي ان حدني للنار بـــــــــردك
ويا شتاي إن حدني للثلج صـــــالي
وحد الله من يودك ما يضـــــــــدك
لا وربي ما طرى الطاري في بالي
اعترافي سجله من راس عنــــــدك
إيه أحبك بأول أيامي وتـــــــــــالي
الغلااا لك والوعد والعهد عهــــدك
بس لاتجرح شعوري بالتعـــــــــالي
ابشرابشر بالرضا وابشر بسعــــدك
ماتروح إلا من الضيقات خالـــــــي
فل حجانك وكف دموع خـــــــــدك
اقبلت لك بالفرح بيض الليـــــــــالي
أحبــــــك
أحبك كلمة يجرحها غيابك وانتظار سنيـن
مفاهيم الغلا فيها عكس مضمون معناهـــا
أحبك فوق كل الحب أحبك لو جراح البين
عطتني هم هالدنيا وأنا الأحزان مقواهــــا
أحبك نبته يرويها عطش قلبي بدموع العين
حياتي يا حياتي في شقا وأوهام ما أقساهـا
أحبك لو جرح طيفك شقا قلبي بلا تكويـــن
ولوللحب في دربك بقايا جروح آطاهــــــا
أحبك فعلا أحبك ..أحبك مالها تثميـــــــــن
بقاموس الهوى كلمة وفا واخلاص مبداهـا
بارق الوسم
ما كنت أضمك فال واقرابك كـــــــفوف
ماكنت أشيلك روح وأرمي بهــــا أرواح
لو ما كرهت بوصفك الصارخ وصـوف
لو ما عشقت بجرحك النازف جــــــراح
ما والله أنشد عنك خطوة ولا شـــــــوف
واقصد واهيجن لك على كل ملــــــواح
أصبحت في دنياك وامسيتها ظـــــروف
الحلم جف وبارق الوسم مـــــــــــا لاح
ضاع العمر كلمات والعاشق حـــــروف
كيف آخذ وأعطيك وأهديك الأفــــــراح
لو بالغلا والشوق والخاطر كـــــــلوف
ما جيت أردك للتعب وأنت مرتــــــــاح
أما اذكرك بالخيروأنساك معــــــــروف
وإلا اضحكك وأبكيك مسرى ومصبــاح
كني مثل مجنون بالعقل مكتـــــــــــوف
وإلا ضرير ..بالعصى يمسك وطـــــاح
بين أكتبك واقراك وارسمك ملــــــهوف
لا ما هقيتك حلم فيه الزمــــــــــــن راح
شح الزمن فيك
البعد بيني وبينك ما قتل شـــــــوقي
يزيد شوقي ونار البعد تكوينــــــــي
حفظت للحب حق وضاعت حقوقي
أبغى العزاء عنك لكن من يعزينــي
حبك سطا خليط الدم بعروقـــــــي
شقيت بك يا معذبني ومشقينــــــــي
محلا عذابك لروحي ياسبب عـوقي
أغليك واغليت من شانك شقا سنيني
أشغلت بالي وبعدك ما قتل شوقـــي
كلي أمل باللقاء من بينك وبينــــــي
عتاب
وين الوعد وإلا وعودك سواليف
ووين الوفا يا داله عن غيــــــابي
كيف الرجا عندي غدا بالصواديف
ياكودها تنهي بشوفك عــــــــذابي
يا غالي اذكر غلا قلب مريــــــف
داراك واسأل قلبك اللي درى بـي
جتك العواطف منه من غير تزييف
صريحة تشكي حنين لجــــــــــابي
مســــموح تــرحــل
راجع وأنا قلبي من العام مجــــروح
راجع تبي نسيان مافات ويــــــــاك
راجع وعينك تذرف الدمع مســفوح
وفر دموعك ما بقى غير ذكــــراك
إن جيت وإلا رحت ما شوف مصلوح
ريح ضميرك وابتعد ما فقدنـــــــاك
العام قلبي ما شكاالجرح مذبـــــوح
يرجي وصالك ويرتجي يوم لقيــاك
واليوم مالك منزل داخل الـــــروح
مات الغلا من يوم غرتك دنيــــــاك
موضوع: اتمنى ان تنال اعجابكم 
11th نوفمبر 2008, 4:07 pm
